Dafi Robotics Georgia: AI რობოტები ქართულ სტუმარმასპინძლობაში

ქართულ Horeca სექტორში ინოვაციების ახალი ტალღა იწყება. იმ ფონზე, როდესაც ბიზნესი კადრების დეფიციტსა და მზარდ საოპერაციო ხარჯებს ებრძვის, ბაზარზე გამოჩნდა Dafi Robotics Georgia. კომპანია, რომლის მიზანიც არა ადამიანების ჩანაცვლება, არამედ მათი რუტინისგან გათავისუფლება და ბიზნესის ეფექტურობის გაზრდაა.

Horeca Georgia წარმოგიდგენთ Dafi Robotics Georgia-ს, რომელიც ქართული მასპინძლობის ინდუსტრიაში ტექნოლოგიური გადაწყვეტების დანერგვაზე აქტიურად მუშაობს. კომპანიის დამფუძნებელი, დავით დარბინიანი, იხსენებს, რომ იდეა ერთი წლის წინ სრულიად მარტივი მიზეზით გაჩნდა: მოეგვარებინათ ქართული ბიზნესის „ტკივილები“. მისი თქმით, რობოტექნიკა აზიასა და ევროპაში უკვე დიდი ხანია აპრობირებული მეთოდია და საქართველოც მზად არის ამ ნაბიჯისთვის.

რატომ რობოტები?

ხშირად AI (ხელოვნური ინტელექტი) მხოლოდ ციფრულ სამყაროსთან ასოცირდება, თუმცა Dafi Robotics-ს ეს ტექნოლოგიური ინსტრუმენტი ფიზიკურ დამხმარედ შემოჰყავს კვების ობიექტების დარბაზებში.

„რობოტებს შეუძლიათ იმის გაკეთება, რაც ჩვეულებრივ AI-ს არ შეუძლია – ეს არის ფიზიკური მუშაობა და რუტინული დავალებების შესრულება. ეს ქართულ Horeca-ს მისცემს საშუალებას, მოიპოვოს სტაბილური დამხმარე, მეორეხარისხოვანი კადრი, რომელიც ცხოვრობს თქვენს ობიექტზე და არ გარბის კონკურენტთან“, - აღნიშნავს დავით დარბინიანი.

ფუნქციონალი და „სალობიე ბიას“ გამოცდილება

Dafi Robotics-ის ასორტიმენტი მრავალფეროვანია: ჰოსტეს-რობოტები, სერვის-რობოტები და რობოტი-დამლაგებლებიც კი. მათი ინტეგრაცია მარტივია – ინტერფეისი სრულად ქართულენოვანია და პერსონალი მათ ათვისებას სულ რაღაც 2-3 დღეში ახერხებს.

ამის ნათელი მაგალითია რესტორანი - სალობიე ბია, სადაც რობოტი ე.წ. „რანერის“ ფუნქციას ასრულებს. ის ეხმარება მიმტანებს მძიმე თეფშების ტარებაში, მაგიდების გაშლასა და ალაგებაში. შედეგად, მიმტანებს მეტი დრო რჩებათ სტუმრებთან კომუნიკაციისთვის.

„მიმტანები აღარ ატარებენ სიმძიმეებს და მათი მუშაობა ბევრად უფრო სწრაფი გახდა. როგორც თავად ამბობენ, 15-20 კაციანი მაგიდის გაშლა და ალაგება ახლა მხოლოდ 5 წუთს საჭიროებს“.

ეკონომიკური სარგებელი და „Wow ეფექტი“

ბევრისთვის რობოტი მხოლოდ სტუმრების გასართობი „სათამაშოა“, თუმცა ციფრები სხვა რეალობაზე მეტყველებენ. ერთი რობოტი რუტინული დავალებების 80%-ს ფარავს და შეუძლია ერთი თანამშრომლის ხარჯი დაზოგოს. ქართული ხელფასების გათვალისწინებით, ინვესტიციის ამოღება (ROI) საშუალოდ 15 თვეში ხდება.

ამასთანავე, რობოტი გამორიცხავს „ადამიანურ ფაქტორს“ – მას არასოდეს ავიწყდება სტუმარს მიმდინარე აქციების შესახებ აცნობოს, რაც პირდაპირ აისახება გაყიდვებზე. და რა თქმა უნდა, ვიზუალური მხარე: სტუმრები აღფრთოვანებულები არიან, როდესაც რობოტი მღერის ან ცეკვავს, რაც სოციალურ ქსელებში დამატებით უფასო რეკლამას ნიშნავს.

შიშიდან აღიარებამდე

მიუხედავად აშკარა სარგებლისა, დავით დარბინიანი ამბობს, რომ მთავარი სირთულე მაინც საზოგადოებაში არსებული შიშია.

„ზოგს ეშინია ამ ტექნოლოგიების, უყურებენ როგორც მტერს და არა როგორც ინსტრუმენტს. თუმცა, თავის დროზე ელექტროენერგიაც ასეთ რეაქციას იწვევდა. დღეს კი ბინას არ შევიძენთ, სადაც შუქი არ არის“.

მომავლის გეგმები

Dafi Robotics Georgia-ს სამომავლო გეგმები საკმაოდ დიდია და ამბიციურია. ჰორეკა სექტორის გარდა, ისინი ხედავენ პოტენციალს როგორც ლოგისტიკასა და მედიცინაში, ისე საცალო ვაჭრობის (Retail), მაგალითად სუპერმარკეტების მიმართულებით. კომპანიის დამფუძნებელი დარწმუნებულია, რომ 5 წელიწადში რობოტების გარეშე ბიზნესის მართვა ისეთივე წარმოუდგენელი იქნება, როგორც დღეს სოციალური ქსელების გარეშე.

ცნობისათვის, მათთვის, ვინც ჯერ კიდევ ორჭოფობს, კომპანიას განსაკუთრებული შეთავაზება აქვს: 1-კვირიანი უფასო ტესტ-დრაივი. ეს ბიზნესის მფლობელებს საშუალებას აძლევს, ყოველგვარი ფინანსური რისკის გარეშე ნახონ, როგორ ცვლის ტექნოლოგია მათ ყოველდღიურობას.