გთხოვთ დაიცადოთ…
ქართველმა ემიგრანტებმა ტოსკანაში, კერძოდ კი ქალაქ პიზაში ქართული რესტორანი - "ოქროს საწმისი" გახსნეს
იტალიაში, კერძოდ კი ულამაზეს და ისტორიულ ქალაქ პიზაში, სადაც საუკუნოვანი ისტორია ყოველ ნაბიჯზე იგრძნობა, ქართული კულტურისა და გასტრონომიის ახალი კერა გაჩნდა. პიზის ცნობილი დახრილი კოშკიდან სულ რამდენიმე წუთის სავალზე, ქართველმა ემიგრანტებმა რესტორანი „Vello d’oro“ (ოქროს საწმისი) გახსნეს, სადაც საკუთარი ისტორიის სრულიად ახალი თავის წერა დაიწყეს.
ეს სივრცე გაცილებით მეტია, ვიდრე უბრალოდ კვების ობიექტი. სამშობლოს მონატრებული ქართველი ემიგრანტებისთვის ის მშობლიურ სახლთან და მოგონებებთან დამაკავშირებელი ხიდია, ხოლო ადგილობრივი იტალიელებისა და მრავალრიცხოვანი ტურისტებისათვის - საქართველომდე მისასვლელი კიდევ ერთი ეგზოტიკური გზა, რომელიც ქართული გემოვნების, ტრადიციებისა და ავთენტური სტუმართმოყვარეობის გავლით გადის.
ნამდვილი ქართული გემოები იტალიურ ბაზარზე
როგორც რესტორნის დამფუძნებელი, დავით გვაზავა აღნიშნავს, მათ სივრცეში მოსულ სტუმრებს ქართული სამზარეულოს სრულფასოვანი გამოცდილება ელოდებათ. კერძებთან ერთად, რესტორანს საქართველოდან სპეციალურად ჩამოაქვს საკუთარი წარმოების ქართული ღვინოები — რქაწითელი და საფერავი, ასევე ტრადიციული ქართული ლიმონათები.
„ჩვენი მიზანია, მაქსიმალურად გავაცნოთ იტალიელებს ქართული კულტურა და სამზარეულო. სტუმრებს ძალიან მოსწონთ ჩვენი კერძები. ბევრი იტალიელი ჩვენთან პირველად აგემოვნებს ამ ყველაფერს, თუმცა გვყავს ისეთი სტუმრებიც, რომლებიც უკვე ნამყოფები არიან საქართველოში და მიზანმიმართულად ითხოვენ კონკრეტულ კერძებს, როგორებიცაა ოსტრი, ოჯახური და, რა თქმა უნდა, ხინკალი“, — აცხადებს დავით გვაზავა.
სამზარეულოს საიდუმლო: ავთენტური სუნელები საქართველოდან
იმისათვის, რომ გემოები იყოს მაქსიმალურად ზუსტი და არ დაიკარგოს ის უნიკალურობა, რაც ქართულ გასტრონომიას ახასიათებს, რესტორნის გუნდი კომპრომისებზე არ მიდის. „ოქროს საწმისის“ შეფი, დათო ჩაფიჩაძე, ამბობს, რომ სამზარეულოს მთავარი საიდუმლო პირდაპირ სამშობლოდან მოდის:
„ჩვენ სპეციალურად ვაგზავნინებთ საქართველოდან ტრადიციულ სუნელებს, რათა იტალიელებს ზუსტად ის სპეციფიკური და ნამდვილი გემო მივაწოდოთ, რაც ჩვენს სამზარეულოს აქვს. მენიუში კერძების არჩევანი მრავალფეროვანია, თუმცა ძირითადი აქცენტი მაინც ხინკალზე, ქაბაბსა და მწვადზე კეთდება“.
პიზაში, სადაც გასტრონომიული კონკურენცია საკმაოდ მაღალია, „Vello d’oro“ წარმატებით ახერხებს დაამტკიცოს, რომ ქართულ სტუმართმოყვარეობასა და საუკუნოვან კულინარიულ ტრადიციებს მსოფლიოს ნებისმიერ წერტილში შეუძლია ადამიანების გულების დაპყრობა.
წყარო: Ermes TV
კეთილი იყოს თქვენი მობრძანება Horeca Georgia-ს ახალ რუბრიკაში „თბილისური ნომრები“, სადაც მე-18 და მე-19 საუკუნეების საქართველოს სტუმარმასპინძლობის მივიწყებულ ისტორიებს გავაცოცხლებთ. ჩვენ ერთად შევაღებთ ძველი ქარვასლებისა და კავკასიის პირველი ფეშენებელური ევროპული სასტუმროების კარებს, რათა აღმოვაჩინოთ ეპოქალური ბიზნეს-მოდელები, უნიკალური სერვისის ტრადიციები და ბოჰემური თბილისის შარმი. საარქივო მასალებზე, რეალურ ფაქტებსა და ისტორიულ ლეგენდებზე დაყრდნობით, ნაბიჯ-ნაბიჯ თვალს მივადევნებთ, თუ როგორ იქმნებოდა და ვითარდებოდა ადგილობრივი ჰორეკა-ინდუსტრია.
რუბრიკაში "ასე დაიწყო ყველაფერი", Horeca Georgia გიამბობთ ჩვენს სექტორში არსებულ პოპულარულ და შედარებით ნაკლებად ცნობილ ბრენდებზე, მათი დაფუძნების ისტორიასა და დამფუძნებლების ანტრეპრენერულ თავგადასავლებზე.
ზაფხულის სეზონის მოახლოებასთან ერთად, აჭარის ტურისტულ ჰაბში სიახლეებია. მიმდინარე სეზონზე ბათუმის პლაჟებზე შეზლონგებისა და ქოლგების იჯარის ფასი 5 ლარიდან 10 ლარამდე იზრდება.
